ინტერვიუ "ჩერეზ" ტვინით

ორშაბათს, კოალიცია „ქართული ოცნების“ ბრიფინგის მიმდინარეობის დროს სპეციალური განცხადება მილიარდერმა ბიძინა ივანიშვილმაც გააკეთ (თამაზ თამაზაშვილთან განცხადებით), მერე კი, „ალია ჰოლდინგის“ ჟურნალისტს გელა ზედელაშვილს ზედა სართულზე ასვლა და განცალკევებით საუბარი შესთავაზა. ზედელაშვილმა ეს შეთავაზება მიიღო და დიქტოფონიც გადასცა მილიარდერის დაცვას, თუმცა, ივანიშვილი გააფრთხილა, რომ საუბარს აღიდგენდა და გამოაქვეყნებდა:

-უფლება უნდა მომცეთ, რომ ჩვენი შეხვედრის შესახებ დავწერო. გამოგიტყდებით, მე ერთი დიქტოფონი თავში მაქვს ჩამონტაჟებული.

-კი, კი, დაწერეთ, არაა პრობლემა, ოღონდ დელიკატურ რაღაცეებს ნუ დაწერთ, მე ვაპირებ გულწრფელ და შინაურულ საუბარს“.

შეთანხმებისამებრ, ავტორმა ინტერვიუდან ყველა პიკანტური დეტალი ამოიღო. გთავაზობთ, ჩემი აზრით, მეტნაკლებად საინტერესო პოლიტიკურ დეტალებს საუბრის იმ ნაწილიდან, რომელიც „ალიას“ დღევანდელ (1 მაისი, 2012წ.) ნომერში, მე-10-11 გვერდებზე გამოქვეყნდა:

-...ამას დაველაპარაკები, იმას არ დაველაპარაკები, მავანი მიშას დავალებას ასრულებს და ასე შემდეგ. გამაგებინეთ, ამ ხელისუფლების მტრებს რატომ იხდით თქვენს მტრებად?

-ვის უნდა დაველაპარაკო, შალვა ნათელაშვილს, რომელიც ხელისუფლებამ „დაავერბოვკა“? როდესაც მაგას დასაჭერად დასდევდნენ, დავურეკე ვანო მერაბიშვილს და ვკითხე, რატომ არ იჭერთ, თუ დამნაშავეა-მეთქი? ვანომ იცით, რა მიპასუხა? ბატონო ბიძინა, რატომ უნდა დავაპატიმროთ, მაგაზე უკეთეს კაცს სად ვიშოვითო? კიდევ ვის დაველაპარაკო, ნინო ბურჯანაძეს? ბადრი ბიწაძე თქვენ გაუშვით უცხოეთში?“

„შეიძლება „რესპუბლიკელებს“ რეიტინგი არა აქვთ, მაგრამ ისინი განათლებულები არიან, დალაგებული აზროვნება აქვთ. ბურჯანაძეზე გითხარით, ნათელაშვილზეც გითხარით. მითხარით, სხვა ვისთან წავსულიყავი, „ქრისტიან-დემოკრატებთან?“ ეს პარტია სააკაშვილმა შექმნა და დღემდე ის პატრონობს. მე ვერ დაველაპარაკები გაყიდულ ადამიანებს, რა აზრი აქვს?“

„მე სააკაშვილს არ ვაფინანსებდი, ფულს ვხარჯავდი კონკრეტულ საქმეებში. მისთვის პირადად არასოდეს მიმიცია.“

„ეგენი თავს ისე მაჩვენებდნენ, თითქოს საქმეს აკეთებდნენ. კი ვხვდებოდი, რაღაც რომ ვერ იყო ისე, როგორც უნდა ყოფილიყო, მაგრამ მეგონა, გამოსწორდებიან, ჭკუას ისწავლიან-მეთქი. ახლა ვგრძნობ, როგორ მატყუებდნენ.“

„როგორც კი მოვედი პოლიტიკაში, ეგრევე მთხოვეს ხელშეუხებლობის გარანტია, ნუ დაგვიჭერო. მე ვუთხარი: არა, მე არავის დასჯას არ ვაპირებ, ყველაფერი გადაწყვიტოს დამოუკიდებელმა სასამართლომ-მეთქი.

-ვაა, ვინ გთხოვათ ხელშეუხებლობის გარანტია?

-ამათ, ვინც არიან ხელისუფლებაში... „ნაციონალების“ რეიტინგი დაცემულია, სადღაც 30 პროცენტის ფარგლებში ტრიალებს. ჩვენ დავიწყებთ მაისში უფრო ინტენსიურ მუშაობას და უფრო გაუჭირდებათ. ზუსტი მონაცემები გვაქვს. დიდი მუშაობაა საჭირო, ჩვენ 70 პროცენტი უნდა წამოვიყვანოთ.

-ბადრი პატარკაციშვილთან მართლა ცუდი ურთიერთობა გქონდათ?

-არა, ბადრისთან ნამდვილად არ მქონია ცუდი ურთიერთობა, ის ხშირად მწერდა წერილებს. 2007-ში შევხვდით, ვურჩიე, თავიდან მოეშორებინა ზოგიერთი და არ წასულიყო ასეთ რისკზე. მან მითხრა, გვერდით თუ არ დამიდგები, წინ მაინც ნუ დამხვდებიო. გავეცალე, მაშინ სხვანაირად ვფიქრობდი.

-არადა, ორ მილიარდერს უფრო მეტი ძალა ექნებოდა.

-კი, ალბათ, მაგრამ მაშინ არ ვიყავი ამ ჭკუაზე. კაცმა რაც მითხრა, გავაკეთე, ავდექი და გავეცალე.

-ბატონო ბიძინა, ბადრიმ თქვა 2007 წელს, ბოლო ცენტს დავხარჯავ და ამ ხელისუფლებას მოვიშორებო, მაგრამ არ დასცალდა. თქვენ რამდენზე ხართ წამსვლელი, ამ ბრძოლაში დახარჯავთ ბოლო ცენტამდე?

-აუცილებლად. ბოლო ცენტამდე დავხარჯავ და ამათ გავუშვებ.

-ძალიან კარგი...“

„მე ერთხელ მითხრა რობიკო სტურუამ, ესენი უსისხლოდ არ წავლენო. ვეთანხმები, მაგრამ ჯერ უნდა ვცადოთ, რომ არჩევნებით გავუშვათ“.

„...მეც ვატყობ, რომ ხშირად თავს ვერ ვიკავებ. მინდა, სიმართლე ავუხსნა ყველას, მაგრამ თითქოს ამის გაგებაც არ უნდათ“ (ჟურნალისტებზე).