მამა რეანიმაციაშია ისევ...ნუ მილოცავთ იმას, რაც არ იცით, ზუსტად ისევე როგორც მაშინ მისამძიმრებდით! – ქეთი წიკლაურის მიმართვა

მომღერალ თემურ წიკლაურის ჯანმრთელობის მდგომარეობასთან დაკავშირებულ ცრუ ინფორმაციას მისი შვილი ქეთი წიკლაური გამოეხმაურა.

როგორც ირკვევა, ინტერნეტში გავრცელდა ინფორმაცია, რომ თემურ წიკლაური კარგად არის, როცა მისი მდგომარეობა კვლავ სტაბილურად მძიმეა და რეანიმაციულ განყოფილებაშია მოთავსებული.

„ჩემო ძვირფასო მეგობრებო! მე მესმის თქვენი ყველასი ინტერესი მამას მდგომარეობასთნ დაკავშირებით და ჩვენი ოჯახის განსაცდელის ასე გულთან ახლოს მიტანისათვის, თქვენ თითოეულს უღრმესი მადლობა. მე ყოველდღიურად ვხედავ და ვგრძნობ ამას და მადლობელი ვარ თქვენი ასეთი სიყვარულისათვის და გვერდში დგომისათვის.

მაგრამ ძალიან დიდი სურვილი გამიჩნდა, დღეს რომ გითხრათ უკვე ჩემი სიტყვებით და არა ჩემი შვილისგან გაზიარებული სტატუსით შემდეგი. უმორჩილესად გთხოვთ, ნუ მიიღებთ აბსოლუტურ სიმართლედ ასეთი ტიპის სტატუსებს! პირდაპირ ვიტყვი – ჩემთვის უზნეოს და არაეთიკურს! ვინაიდან ერთი სიტყვითაც არ შეუკითხავთ არავის და არ შემხმიანებია არც ერთი „ჟურნალისტი“ ამ საიტიდან, რომ ასე მარჯვედ და დიდის სასიხარულო დადასტურებით დაედოთ აქ ეს ინფორმაცია. ექიმებთან საუბრიდანაც ვიცი, რომ მათ არავისთვის არ მიუციათ ოფიციალური ინფორმაცია (ჩემი თანხმობის გარეშე და ჩვენი ოჯახის სურვილის გარეშე, ისინიც კი ვერ ბედავენ ვერანაირი ინფორმაციის გაცემას). აქედან გამომდინარე, გთხოვთ, ნუ დაიჯერებთ ინტერნეტ-სტატუსების ჟივილ-ხივილს, ანდა ცოტა ხანი მაინც შეჩერდით თქვენს მწუხარებასა თუ სიხარულში, სანამ არ დადასტურდება ინფორმაციის ავთენტურობა.

ნუთუ 2 კვირის წინანდელი ამბავი აშკარა მაგალითი არ იყო იმისა, თუ როგორ უნდა აღიქვა და გაფილტრო ინტერნეტში ინფორმაცია?! როდესაც საჭიროდ ჩავთვლი, მე თვითონ გაცნონბებთ, ღმერთის წყალობით სასიხარულო ინფორმაციას. ნუ მილოცავთ იმას, რაც არ იცით რომ სიმართლეა, ზუსტად ისევენაირად როგორ მაშინ მისამძიმრებდით! თუ ჩემთან არ გებადებათ ის თავდაპირველად საჭირო შეკითხვა – ქეთი, მამა როგორაა, რომ დაელოდოთ ჩემს პასუხს და ეგრევე მოლოცვებით მახარებთ, – ხომ არ ჯობია, მაშინ ჯერ იმათთან გადაამოწმოთ, სადაც ამოიკითხეთ ეს სიახლე, პირადში მიწერეთ მათ და შეეკითხათ საიდან იციან და ვინ მოაწოდა ეს ინფორმაცია და ნამდვილად სიმართლეა თუ არა? და მერე კიდევ ცოტა ხანი დაელოდეთ…..აბა კიდევ რას დაწერენ ინტერნეტში… გარწმუნებთ, ჩემზე მეტად არ გენდომებათ მამა რომ კარგად იყოს. ამჟამად მამა რეანიმაციაშია ისევ, სტაბილურად მძიმე. გმადლობთ“, – წერს ქეთი წიკლაური.

შეგახსენებთ, თემურ წიკლაური კორონავირუსის დიაგნოზით გორის სამხედრო ჰოსპიტალში გადის მკურნალობის კურსს.

კომენტარი