გაბრიელ სალოსის ქუჩაზე 15 საათია სპეცოპერაცია მიმდინარეობს - სამართალდამცველები ტერორიზმში ეჭვმიტანილ პირებს ეძებენ
გაბრიელ სალოსის გამზირზე უკვე 15 საათია სპეცოპერაცია მიმდინარეობს. არსებული ინფორმაციით, სამართალდამცველები და სპეცრაზმი ორი პირის აყვანას ცდილობენ, რომლებიც ერთ-ერთი საცხოვრებელი კორპუსის ბინაში იმყოფებიან. სამართალდამცველებს ბლოკირებული აქვთ რამდენიმე კორპუსის შესასვლელი ტერიტორია. სპეცოპერაციას სახელმწიფო უსაფრთხოების სამსახური ატარებს.
გამთენიის 05:00 საათიდან მიმდინარეობდა შტურმი, რომელიც დაახოებით ერთი საათის განმავლობაში გაგრძელდა. შტურმის დროს ისმოდა ძლიერი აფეთქებებისა და სროლის ხმა. შტურმამდე რამდენიმე წუთით ადრე კი კორპუსიდან, სადაც სუს-ი სპეცოპერაციას ატარებს, მოსახლეობა გამოიყვანეს.
"სახელმწიფო უსაფრთხოების სამსახურის კონტრტერორისტული დეპარტამენტი ბერი გაბრიელ სალოსის ქუჩაზე სპეცოპერაციას ატარებს. პირებმა, რომელთა დაკავების ოპერაციაც მიმდინარეობს, სპეციალური დანაყოფის მიმართულებით ცეცხლი გახსნეს. ამ დროისთვის ისინი ერთ-ერთ საცხოვრებელ ბინაში იმყოფებიან. სპეცოპერაციის ადგილის მიმდებარე ტერიტორიაზე მცხოვრები მოსახლეობის უსაფრთხოება დაცულია", - აცხადებენ სუს-ში.
სპეცოპერაციის ადგილზე სასწრაფო სამედიცინო დახმარების ერთი მანქანაც შევიდა. ადგილზე მთელი ღამის განმავლობაში მობილიზებული იყო სხვა ბრიგადებიც, ასევე სახანძრო-სამაშველო ჯგუფები. დილით კი სპეცოპერაციის ადგილზე პიკაპის ტიპის რამდენიმე ავტომობილით სპეცრაზმის დამატებითი ძალები შევიდა.
მსგავსი სიახლეები
კომენტარი