IFC-ი აფინანსებს საქართველოში ერთ-ერთი პირველი სამვარსკვლავიანი ბრენდული სასტუმროს მშენებლობას

IFC-ი აფინანსებს საქართველოში ერთ-ერთი პირველი სამვარსკვლავიანი ბრენდული სასტუმროს მშენებლობას, რაც ხელს შეუწყობს სამუშაო ადგილების შექმნას და ეკონომიკის განვითარებას

საქართველო, თბილისი, 26 ნოემბერი, 2015— საერთაშორისო საფინანსო კორპორაცია (IFC), რომელიც მსოფლიო ბანკის ჯგუფის წევრია, 7 მლნ. აშშ დოლარს საკრედიტო რესურსს გამოუყოფს სს m2 უძრავი ქონების შვილობილ კომპანიას საერთაშორისო ბრენდის სამვარსკვლავიანი სასტუმროს ასაშენებლად, რაც ხელს შეუწყობს სამუშაო ადგილების შექმნას, სასტუმრო ინფრასტრუქტურის ხარისხზე მზარდი მოთხოვნის დაკმაყოფილებას და ეკონომიკური ზრდის სტიმულირებას.

ტურიზმი და მოგზაურობა საქართველოში სწრაფად განვითარებადი ორი სექტორია, რომელიც სამუშაო ადგილების შექმნის ერთ-ერთი ძირითადი წყაროა. თუმცა, დაბალბიუჯეტიანი და საშუალო ფენაზე გათვლილი სასტუმროების სეგმენტი პრაქტიკულად განუვითარებელია, რაც განაპირობებს დიდ განსხვავებას მოთხოვნასა და მიწოდებას შორის. თბილისში Ramada Encore–ს მშენებლობის დასაფინანსებლად ს.ს. უძრავი ქონების შვილობილი კომპანიისთვის IFC–ის მიერ გამოყოფილი სესხი სწორედ ამ სხვაობის აღმოფხვრას ისახავს მიზნად.

”მრავალი წელია IFC–სთან წარმატებით ვთანამშრომლობთ, ამ ახალი პროექტით ჩვენ ვგეგმავთ საქართველოში სასტუმროების ინფრასტრუქტურის გაუმჯობესებას და ქვეყნის მასშტაბით მოგზაურობაზე მზარდი მოთხოვნის დაკმაყოფილებას,”- აღნიშნა „m² უძრავი ქონების" გენერალურმა დირექტორმა ირაკლი ბურდილაძემ.

152 ნომრიანი სასტუმრო პირველი ნაბიჯი იქნება სს m2 უძრავი ქონების გეგმის შესრულების მიმართულებით, რომელიც გულისხმობს თბილისში და, შესაძლოა საქართველოს სხვა ქალაქებშიც, 300 მეტი ხელმისაწვდომი სასტუმრო ნომრის მშენებლობას. ამასთან ერთად, სასტუმრო გეგმავს ენერგოეფექტური ტექნოლოგიების გამოყენებას ელექტროენერგიის მოხმარების შემცირების მიზნით.

“ჩვენ ხელს ვუწყობთ საქართველოში კერძო სექტორის განვითარებას, განსაკუთრებით ბიზნესინფრასტრუქტურის კუთხით, მსგავსად დაბალბიუჯეტიანი და საშუალო ფენაზე გათვლილი სასტუმროების დაფინანსებისა, რადგან ასეთი ინფრასტრუქტურის არსებობას შეუძლია ბიზნესის და ტურიზმის განვითარების წახალისება”, - აღნიშნა IFC-ის რეგიონულმა მენეჯერმა სამხრეთ კავკასიაში იან ვან ბილსენმა. მისივე თქმით, “სასტუმროების სექტორი განაპირობებს მცირე ბიზნესის განვითარებას, რომელიც უზრუნველყოფს საქონლისა და მომსახურების მიწოდებას მშნებელობის პროცესში და ასევე ხელს უწყობს ქვეყნის ეკონომიკურ ზრდას.”

პროექტის დასრულების შემდეგ თბილისში გახსნილი სასტუმრო Ramada Encore უზრუნველყოფს 100-ზე მეტ პირდაპირ და არაპირდაპირ სამუშაო ადგილს. სასტუმროების და ტურიზმის სფეროებში სამუშაო ადგილების შექმნას ხშირად მულტიპლიკატორის ეფექტი აქვს და არაპირადპირ უწყობს ხელს ბევრ სხვა სფეროში დასაქმებულთა რაოდენობის ზრდას, რაც განვითარებად ქვეყნებში IFC–ის მიერ სასტუმროების ინდუსტრიის მხარდაჭერის ერთ-ერთი უმთავრესი მიზეზია. 1956 წლის შემდეგ IFC–იმ განახორციელა დაახლოებით 2.7 მლრდ. აშშ დოლარის ინვესტირება 276 ტურისტულ და სასტუმროებთან დაკავშირებულ პროექტში 90 ქვეყანაში. ამასთან, ამ ინვესტიციების ნახევარი განვითარებად ქვეყნებში იქნა განთავსებული.

საქართველო IFC-ის წევრი 1995 წელს გახდა. მას შემდეგ, IFC-ის გრძელვადიანმა ინვესტიციებმა საქართველოში 1 მილიარდი აშშ დოლარი შეადგინა სხვადასხვა სექტორის 52 პროექტში. ამ თანხიდან 362 მილიონი აშშ დოლარი პარტნიორებისგან იქნა მოზიდული. გარდა ამისა, IFC-მ 300 მილიონი აშშ დოლარამდე ღირებულების სავაჭრო ტრანზაქციებს შეუწყო ხელი სავაჭრო დაფინანსების პროგრამის ფარგლებში. IFC საქართველოში ასევე ახორციელებს საკონსულტაციო პროექტებს, რომლებიც კერძო სექტორის განვითარებას ისახავს მიზნად.

IFC-ის შესახებ

IFC, მსოფლიო ბანკის ჯგუფის წევრი, განვითარებაზე ორიენტირებული ყველაზე მსხვილი საერთაშორისო ინსტიტუტია, რომელიც განვითარებად ქვეყნებში კერძო სექტორს უწყობს ხელს. ჩვენ ვმუშაობთ 2,000-ზე მეტ ბიზნეს კომპანიასთან მსოფლიოში და ვიყენებთ ჩვენს კაპიტალს, ცოდნასა და გავლენას, რათა შევქმნათ განვითარებისთვის საჭირო შესაძლებლობა იქ, სადაც ამის საჭიროება ყველაზე მწვავეა. 2015 ფინანსურ წელს, ჩვენმა გრძელვადიანმა ინვესტიციებმა განვითარებად ქვეყნებში თითქმის 18 მილიარდ აშშ დოლარს მიაღწია. ეს ფინანსური რესურსი მიზნად ისახავს ხელი შუწყოს კერძო სექტორს შეასრულოს გადამწყვეტი როლი უკიდურესი სიღარიბის დაძლევასა და ცხოვრების დონის გაუმჯობესებაში. დამატებითი ინფორმაციის მიღება შესაძლებელია ვებ-გვერდზე: www.ifc.org.

შემოგვიერთდით:

www.facebook.com/IFCwbg

www.twitter.com/IFC_org

www.youtube.com/IFCvideocasts

www.ifc.org/SocialMediaIndex

www.instagram.com\ifc_org

სს m2 უძრავი ქონების შესახებ

სს m2 უძრავი ქონება BGEO GROUP PLC-ის შვილობილი კომპანიაა, რომელიც საქმიანობას ეწევა უძრავი ქონების განვითარების და მართვის სფეროში. დღეისათვის კომპანიას მოზიდული აქვს კაპიტალი და საკრედიტო დაფინანსება დაახლოებით 110 მლნ. აშშ დოლარის მოცულობით. კომპანიამ უკვე წარმატებით განახორციელა 3 საცხოვრებელი პროექტი თბილისის სხვადასხვა უბანში, ხოლო სს m2 უძრავი ქონების მიმდინარე სამი პროექტის დასრულება იგეგმება 2016 წელს. დამატებითი ინფორმაციისთვის ეწვიეთ ვებგვერდს www.m2.ge

კომენტარი