თინა ხიდაშელი: მარტო ქუჩის აქციები კი არ იქნება, ყბაშიც მოხვდებათ

რატომ მეკამათები? კითხვებს რომ მისვამთ, მერე რატომ მეკამათებით? მესმის, რომ თქვენი ხელფასი, თქვენი ბონუსი დამოკიდებულია იმაზე, თუ როგორ ძალიან ამიშლით ნერვებს, მაგრამ ვერ მიშლით ნერვებს, – განმარტავდა მიკროფონების წინ თინა ხიდაშელი "ქართული ოცნების" ოფისში.

თინა ხიდაშელი, "რესპუბლიკური პარტიის" ერთ-ერთი ლიდერი:

– წაკითხულის შინაარსის გადმოცემა ჩემს შვილს მეორე კლასში ასწავლეს. ტაქტიკა არის ასეთი: მე მეუბნებიან, რომ... ეს არ ნიშნავს, რომ კონკრეტული ნათქვამი რეალობაა. ბიძინა ივანიშვილს არ უთქვამს, რომ რესპუბლიკელები ურეიტინგო და არაპოპულარული პარტიაა. მან განაცხადა, რომ მას ასე ეუბნებიან. ფაქტია, რომ საქართველოში არ ყოფილა არც ერთი წარმატებული პროექტი რესპუბლიკელების გარეშე, ასევე ფაქტია, რომ საქართველოში ბოლო 20 წლის განმავლობაში რესპუბლიკელები ყოველთვის ვიყავით ერთ-ერთი მთავარი გამწევი ძალა ყველა ბრძოლაში.

– თქვენ სხვადასხვა დროს ოპოზიციის მიერ გამართულ ქუჩის აქციებს არ შეუერთდით, ამ შემთხვევაში როგორია თქვენი დამოკიდებულება აქციების მიმართ?

– რომელი ქუჩის აქციების მიმართ?

– ქუჩის აქცები, რომლის შესახებაც ბიძინა ივანიშვილმა ისაუბრა.

– არასერიოზულია. აქ საუბარია იმაზე, რომ, თუ ხელისუფლება შეეცდება არჩევნების გაყალბებას, დიახ, მარტო ქუჩის აქციები კი არ იქნება, ყბაშიც მოხვდებათ... კი, ზუსტად შემიძლია, ეს გითხრათ. საერთოდ, რა კითხვაა ეს? ძალიან კონკრეტულად ითქვა აქციებთან დაკავშირებით. რამდენიც არ უნდა ილაპარაკოთ ახლა თქვენ, რომ ბიძინა ივანიშვილმა დააანონსა ქუჩის აქციები, ეს ნიშნავს შემდეგს: „პრაიმტაიმი“ ადასტურებს იმას, რომ მიშა სააკაშვილი აპირებს არჩევნების გაყალბებას. თუ თქვენ თავისუფალი მედია ხართ, აი, ასევე დაწერეთ.

– ჩვენ კი არ ვადასტურებთ, პირიქით, თქვენ გეკითხებით თქვენივე ლიდერის მიერ დაანონსებულ აქციებზე.

– თქვენ თუ მთავარ თემად გაინტერესებთ ქუჩის აქციები, რომელზეც ბიძინა ივანიშვილმა ისაუბრა, ეს იმას ნიშნავს, რომ თქვენ აპრიორი უშვებთ, რომ მიშა სააკაშვილი აუცილებლად გააყალბებს არჩევნებს და კი ბატონო, ამის მერე განაცხადა ივანიშვილმა, რომ ქუჩის აქციები არ არის გამორიცხული.

– ჩვენ არაფერს არ ვუშვებთ. თქვენი ლიდერის მხრიდან ითქვა, რომ არ არის გამორიცხული ქუჩის აქციები.მეც ზუსტად ამ აქციებზე გეკითხებით. პირადად თქვენი, რესპუბლიკელების პოზიცია გვაინტერესებს.

– დიახ, თუ არჩევნები გაყალბდება, გარწმუნებთ, რომ აუცილებლად იქნება ქუჩის აქციები ან სხვა საშუალებები, იმის მიხედვით, იმ წუთას რა უფრო გამოდგება, რათა მიშა სააკაშვილს უკან დავახევინოთ.

– ანუ ეს გზები უკვე დეტალურად განიხილეთ?

– კოალიციაში ძალიან ბევრი გზა განიხილება, მათ შორის ისეთიც, თქვენ რომ ვერ წარმოგიდგენიათ.

– ერთ-ერთ ასეთ „წარმოუდგენელ“ გზას მაინც დაგვისახელებთ?

– არა, არაფერს არ გეტყვით.

– თქვენ იცოდით, ივანიშვილი ქუჩის აქციებს აქტიურად რომ განიხილავდა, თუ ინტერვიუს შემდეგ გაიგეთ?

– რომელი ქუჩის აქციების შესახებ მეკითხებით? არჩევნები თუ გაყალბდა, მერე რომ ქუჩის აქციები იქნება? ეს წინასწარ განხილული თემა კი არ იყო, აბა, გაიხსენეთ, „ვარდების რევოლუციის“ დროს რას ვაკეთებდი? თუ გახსოვთ, მაშინ ეს კითხვა არც უნდა დამისვათ, რადგან თქვენი მხრიდან ეს კითხვა სრული ზომბირების ზღვარზე გადის.

– რა შემთხვევაში აღიარებთ, რომ არჩევნები გაყალბდა, რა კვლევებს დაეყრდნობით?

– იმ შემთხვევაში, თუ მექნება ოქმები, როგორიც მქონდა 2008 წლის იანვარში, ან 2003 წლის 2 ნოემბერს, როდესაც აღმოჩნდა, რომ აზერბაიჯანელებით დასახლებულ ყველა სოფელში ამომრჩევლის 100% მივიდა არჩევნებზე და 100%-მა მიშა სააკაშვილს მისცა ხმა, ჩავთვლი, რომ არჩევნები გაყალბდა. ხომ არ არის რთული გასაგები? მაგიტომ გეუბნებით, რომ ზომბირების ზღვარზე ხართ-მეთქი, თორემ მე არც უნდა მკითხოთ მასეთი რაღაცები... ჩემი პასუხები იცით ამ კითხვებზე. არაფერს განსხვავებულსა და ახალს არ გეტყვით. ახლაც კატეგორიულად გამოვრიცხავ ქუჩის აქციებს. კატეგორიულად გამოვრიცხავ, იმიტომ რომ ჩვენ არჩევნებზე მივდივართ.

– და ქუჩის აქციების გასამართად აირჩიეთ კობა დავითაშვილი და ზვიად ძიძიგური პარტნიორებად? სწორად გავიგე?

– მე არ ვიყავი ქუჩის აქციებზე?

– კი, მაგრამ, ამ მხრივ, კობას უფრო მეტი გამოცდილება აქვს.

– ირაკლი ალასანიას – არა? არ გახსოვთ ირაკლი ქუჩის აქციებზე?

– მახსოვს, მაგრამ ის ყოველთვის გაურბოდა ქუჩის აქციებს, კობასთან შედარებით.

– შედარებით რას ნიშნავს? სტაჟის მიხედვითაა, ვინ რამდენჯერ გაიარა ქუჩაში? აქ საუბარია იმაზე, რომ ჩვენ ვართ დემოკრატიული ძალები ქვეყანაში. ვიმეორებ, დემოკრატიული ძალები, რაც იმას ნიშნავს, რომ ქუჩაში მშვიდობიანი მანიფესტაციების გამართვის უფლება დემოკრატიის შემადგენელი ნაწილია, რაც იმას ნიშნავს, რომ, თუ ადამიანი სხვა არჩევანს არ გიტოვებს, მაგალითად, სამართლიან არჩევნებს, მერე უკვე შენც იძულებული ხარ გამოიყენო სხვა დემოკრატიული ინსტრუმენტები, მაგალითად, მიტინგის ჩატარებისა და მანიფესტაციის გამართვის უფლება. ჩვენ დღეს გამოვრიცხავთ ქუჩას, როგორც ბრძოლის, ხელისუფლების შეცვლის საშუალებას. რა არჩევანს გააკეთებს სააკაშვილი, იმის მიხედვით ვიმოქმედებთ.

არჩევნების გაყალბების შემთხვევაში იქნება ბრძოლა ხმების დაცვის მიზნით. ეს ბრძოლა იქნება ყველგან: თბილისშიც, ვაშინგტონშიც, ბრიუსელშიც, ლონდონშიც, ქუჩაშიც, დარბაზშიც, „ქორთიარდ მერიოტის“ დარბაზში, ელჩებთან ერთად, და ყველა შესაძლო საშუალებით. მათ შორის გამოყენებული იქნება ბევრი ისეთი საშუალება, რომელიც საქართველოში ჯერჯერობით არ გაუკეთებიათ. ვცდილობთ, რომ ვიყოთ ინოვაციურები.

– და ვის გამოცდილებას დაეყრდნობით?

– ამას ინტელექტი სჭირდება და ენერგია, რომელიც ხელისუფლებაში არ არის.

P.შ. ინტელექტი, რომლითაც „რესპუბლიკური პარტია“ ასე ამაყობს, უდავოდ საჭიროა. კარგი იქნება, მათ, ინტელექტთან ერთად, ცოტა რეიტინგიც რომ ჰქონოდათ. რეიტინგი კი ჟურნალისტებთან ხმალაობით ნამდვილად არ მოდის. თუ ეს არ იციან, შევახსენებთ თუნდაც ლევან გაჩეჩილაძისა და გოგა ხაინდრავას მაგალითს. ჩვენთვის ისეთივე მიუღებელია თინა ხიდაშელის აგრესიული დამოკიდებულება, როგორი მიუღებელიც იყო მაია ნადირაძის. ხიდაშელი იქამდეც წავიდა, რომ უზრდელობაში დაგვდო ბრალი, – უზრდელობებს ბეჭდავთო. ჩვენი მრავალგზის თხოვნის მიუხედავად, მან ვერც ერთი სტატია ვერ დაგვისახელა, რომელიც უზრდელობას შეიცავდა, მოგვიანებით კი პრესსამსახურის მეშვეობით შემოგვითვალა: ამ თემაზე აღარ მსურს საუბარიო. როგორც ჩანს, ქალბატონ თინასთვის ყველა, ვინც ისე არ ფიქრობს, როგორც ბიძინა ივანიშვილი, უზრდელი, ზომბი და უცოდინარია. ეტყობა, ივანიშვილი მართალი იყო რესპუბლიკელების შეფასებისას – მათ ხალხის ენაზე საუბარი არ შეუძლიათ.

გაზეთი "პრაიმტაიმი", ხათუნა მგალობლიშვილი

კომენტარი