სააკაშვილის მორიგი კომენტარი გვარამიასთან და ბოკერიასთან მის სატელეფონო საუბრებთან დაკავშირებით

გიგა ბოკერიასთან და ნიკა გვარამიასთან სააკაშვილის სატელეფონო საუბრების გამოქვეყნებას, საქართველოს ექსპრეზიდენტი მორიგი განცხადებით გამოეხმაურა, რომელიც მის ოფიციალურ ფეისბუქ გვერდზე გამოქვეყნდა. განცხადებას დრონი.ჯი უცვლელად გთავაზობთ.

„სატელეფონო საუბრებს იწერენ, შემდეგ ნაწილ-ნაწილ ამუშავებენ პუტინის სპეცსამსახურები და სწორედ ამ ფორმით ხდება რუსული საიტების მიერ გავრცელება. ეს სრულიად აშკარად ატარებს მორიგი სპეცოპერაციის ხასიათს.

მე სხვა რამ უფრო მაღელვებს - ქვეყანას გვართმევენ და ზოგიერთი "ლიბერალი" მზადაა ჩემს მიმართ პირად კომპლექსებს და ჯიბრს გადააყოლოს ყველაფერი. ასე მოხდა 2012 წელს და ამავე გზას ადგანან დღესაც. საბედნიეროდ დღეისთვის ჩვენმა ხალხმა საკმარისი გამოცდილება მიიღო და ასე ადვილად აღარ ყლაპავს რუსების და მათი ადგილობრივი რეზიდენტის შემოგდებულ სატყუარას.

დარწმუნებული ვარ, რომ ყოველგვარი შანტაჟის და მუქარის მიუხედავად ქართველი ხალხი დაიცავს თავის თავისუფლებას და არა მხოლოდ ტელევიზიის, არამედ ქვეყნის დამოუკიდებლობას, ვინაიდან დღეს ეს ერთი და იგივეა.

მე ჯერ კიდევ 2012 წელს ზუსტად ვიწინასწარმეტყველე, რომ ივანიშვილი აუცილებლად მიადგებოდა "რუსთავი 2"-ს. თუ ახლა არ მოხდა გაერთიანება და სიტყვის თავისუფლების დაცვა, რაც ერთი და იგივეა, მაშინ შეგვიძლია დავემშვიდობოთ თავისუფალი არჩევნების იდეასაც კი, და შემდგომში ბევრად უფრო დიდი ექსცესების ფასად დაგვიჯდება თავის დახსნა.

საქართველო აუცილებლად გაიმარჯვებს!“ - ნათქვამია განცხადებაში.

ასევე იხილეთ: სააკაშვილი გამოქვეყნებულ ვიდეოებთან დაკავშირებით კომენტარს აკეთებს და განცხადებას ავრცელებს

კომენტარი